ދުވަސްވަރަކީ އަހަރެން މަދަރުސާގައި ގުރޭޑު 9 ގައި އުޅުނު ދުވަސްވަރެވެ.
އެދުވަސްވަރު ބޭބެމެން ވީ ކިޔަވަން މާލެ ގޮހެވެ. އެހެންކަމުން މަންމަމެން
ކުޅިރޮށި، ކުދިގުޅަ އަދި ތެލުލިކެޔޮފަދަ ހަދިޔާ ހަދައި މާލޭގައި ތިބި ބޭބެމެންނަށް
ފޮނުވައެވެ.
އަހަރެންނަށް އެދުވަހު، މަދަރުސާއިން ނިމިގެން އިންޓަވަލް ގަޑިއަށް
އާދެވުނުއިރު ހުރީ ބަނޑުހައިވެގެންގޮސް އަނެއް އަތަށް އަޅައިފައެވެ. ގޭގެ ހަތަރު
ފަރާތަށް ނަޒަރު ހިންގާލުމުން ގޭގައި އިތުރު މީހަކު ނެތްކަން އެނގުނެވެ. މޭޒު
މައްޗަށް ފޮތްތައް އުކާލުމަށްފަހު ބަދިގެއާ ދިމާއަށް އަވަސް އަވަހަށް ދެވުނީ
އަހަރެންގެ ބަނޑު އެކަމަށް އެދުނު ވަރުންނެވެ. އާދައިގެ މަތިން ބަދިގެއަށް
ފުރަތަމަވެސް ހޫނު ކޮފީއެއް ގިރާލުމަށްފަހު، ފުން ނޭވާއެއް އެތެރެއަށް ދަމައިލީމެވެ.
މިއަދު ސައިގަޑިއަށް ތައްޔާރުކޮށްފައި ހުރީ ކޮންއެއްޗެއްތޯ ބަލައިލުމަށްޓަކައެވެ.
ނަމަވެސް ގޮތް އެނގޭ ކަމުދާކަހަލަ ވަހެއް ނުދުވިއެވެ. އެހެންވެ އަވަހަށްގޮސް ގޮށި
ހިއްލާލުމަށްފަހު ހެދުނު ސަޔަށް ހުރީ ކޮންއެއްޗެއްތޯ ބަލައިލީމެވެ. ގޮށި ދަށުގައި
ހުރި ކިރުގަރުދިޔަ ތަށި ފެނުމުން، ހުރި ހިތާމައެއްގެ ބޮޑުކަމާއޭ އަހަރެންގެ ހިތަށް
އެރިއެވެ. ކިރުގަރުދިޔައަކީ އަހަރެން އެހާ ގަޔާވާ އެއްޗެއް ނޫނެވެ. އެހެންވެ،
ބަދިގެ ތެރެއަށް ނަޒަރެއް ހިންގާލީ އިތުރު ކާ އެއްޗެއް ފެނޭތޯއެވެ.
ގޭސް އުދުން ބަހައްޓާފައިހުރި ކަބަޑުމަތީގައި ހުރި ރިހާކުރު ފުޅިއާއި އެފުޅި
ކައިރީގައި ހުރި ބޮޑު ތަށި ލޮލުގައި އަޅައިގަތީ އެވަގުތު އެވެ. ރިހާކުރު
ފުޅިއަށްވުރެ ބޮޑަށް އެތައްޓާއި ދިމާއަށް ދެވުނީ އެތަށީގައިހުރި ގަދަ އޮރެންޖު
ކުލައިގެ އެއްޗެއްގެ ސަބަބުންނެވެ. އެއެއްޗެއް ހުރީ ރަނގަޅަށް މުގުރާފައެވެ.
ހީވަނީ ސޯސްގަނޑެއް ހެންނެވެ. ނަމަވެސް އޭގެ ކުލައަށް ބަލައި އަހަރެން ނިންމީ އެއީ
މިކްސަރަށް އަޅައި މުގުރާފައި ހުރި ކެރެޓް ކަމުގައެވެ. އަދި މިވާނީ ދައްތަގެ އާ
ރެސިޕީއެކޭވެސް ހިތަށް އެރިއެވެ.
މާކަ ގިނަ ވިސްނުމެއްނެތި އެތަށިން މުށްވަރެއް ނަގައި އަނގަޔަށް
އަޅައިލީމެވެ. އަސްތާއެވެ. ދުވަހަކުވެސް މިހާ އަސަރުގަދަ އެއްޗެއް އަހަރެން ނުކަމެވެ.
އަހަރެންނަށް ކުރި އަސަރާއެކު ދެލޮލުންނާއި ނޭފަތުން ފެން ފައިބާގަތެވެ.
ކަންފަތުން ދުން އަރަން ފެށިއެވެ. އަނގައިން އަލިފާން ނުކުތެވެ. މުޅި މީހާ
އުދާސްވިއެވެ. އަވަހަށް އެއަސަރު ފިލުވައިލުމަށްޓަކައި އަނގައިގާ ހުރި އެއްޗެތި
ސިންކު ތެރެއަށް އަޅައިލުމަށްފަހު އަހަރެން ކުރިން ތައްޔާރުކުރި ކޮފީތަށިން
ކޯވަރެއް ދަމައިލީމެވެ. އެވަގުތު އަހަރެންގެ އަނގައިގެ ތެރޭގައި ހީވީ ތިންވަނަ
ބޮޑު ހަނގުރާމަ ފަށައިގަތް ހެންނެވެ. "ހޮޓް އެންޑް ސްޕައިސީ" ވީއެވެ.
އަނގަތެރެ ނުފިހުނީ ކިރިޔާއެވެ.
އެހާލުގައި އަހަރެން އުޅެނިކޮށް އެހީތެރިކަމުގެ އަތެއް ފޯރުކޮށްދިނީ ހަކުރު
ފާޓާއެވެ. އަހަރެންގެ މަންމައަށް ގެއަށް އާދެވުނުއިރު އަހަރެންނަށް ހުރެވުނީ
ހަކުރު ކާށެވެ. އަހަރެން މަންމައަށް ވީގޮތް ކިޔައިދިނުމުން މަންމަ ފެށީ ހޭށެވެ.
އަދި އެއީ މާލެ ފޮނުވަން ކުޅި ރޮށި ހަދަންވެގެން މުގުރާފައި ހުރި ގިތެޔޮ މިރުސް ކަމަށް
ބުންޏެވެ. އަދި ރަތް ކުލާގައި އެހުރީ ހުސް ރަތް މިރުސް ބޭނުން ކުރީމަ ކަމަށްވެސް
ބުންޏެވެ. އަހަރެންނަށް ބުނެވުނުހާވެސް އެއްޗަކީ އެއީ ކެރެޓެއް ނޫންހެއްޔެވެ؟
- އިސްމާޢިލް
ޝިޔާޒް -
No comments:
Post a Comment