ލާމަސީލު ނަމޫނާއެއް...

ކޮންމެ މީހަކީވެސް ޙަޔާތުގައި ތަފާތު އެތައް ކަންތައްތަކަކާއި ކުރިމަތިލާން ޖެހޭނޭ މީހެކެވެ. ތަފާތު އެތައް ތަޖުރިބާތަކެއް ކުރަން ޖެހޭނޭ މީހެކެވެ. ޙަޔާތުގެ ދުވަސްތަކުގައި ބަހާރު މޫސުން އަންނަ ފަދައިން ގަދަ ތޫފާންތައްވެސް އާދެއެވެ. އެފަދަ ތޫފާންތަކުގައި ކެތްތެރިވެ ހެޔޮ ވިސްނުން އިސްކުރާ މީހުންނަކީ ކާމިޔާބު ލިބޭނޭ މީހުންނެވެ. މިފަދަ އެއްފަރާތަކީ ހއ.އިހަވަންދޫ އާހިޔާ އަޙުމަދު ރަޝީދުއެވެ.

 1974 ފެބުރުއަރީ 5 ވަނަ ދުވަހު މިދުނިޔޭގެ އަލިކަން ދެކެވަޑައިގަތް އަޙުމަދު ރަޝީދު (ދޮންބެ) އަކީ މުޙައްމަދު ޔޫސުފް (ސިއްތި ތުއްތު) އާއި ޖަމީލާ އާދަމަށް ލިބުނު 4 ވަނަ ދަރިފުޅެވެ. އެދެމަފިރިންނަށް ޖުމުލަ 7 ކުދިން ލިބިފައިވާއިރު އަޙުމަދު ރަޝީދަކީ އެދެމަފިރިންނަށް ލިބުނު ހަމައެކަނި ފިރިހެން ދަރިފުޅެވެ. ހއ.އިހަވަންދޫ ވެދުންގެއަށް އުފަންވީ ނަމަވެސް އޭނާ މިހާރު ދިރިއުޅުއްވަމުން ގެންދަވަނީ ހއ.އިހަވަންދޫ އާހިޔާގައެވެ.

މަޅިފަތި ޖައްސަވައިގެން ދޫނި ހިފުމަކީ ކުޑައިރު، ވަރަށް ޝައުޤުވެރިކަމާއެކު އަޙުމަދު ރަޝީދު ކޮށްއުޅުއްވި ކަމެކެވެ. ގޮނޑުދޮށްދޮށުގައި އެކުވެރި ކުދިންނާއެކު ދޫނި ހިފުމުގައި ގިނަ ވަގުތުތަކެއް އޭނާ ހޭދަކުރައްވާފައިވެއެވެ. އޭނާގެ ކުޑައިރުގެ އެންމެ ގާތް އެކުވެރިޔަކީ ގިރިޓީގޭ ޢަބުދުއްޞަމަދެވެ. އަދި ހަމައެހެންމެ އޭނާއަށް ވަނީ ކުޑައިރު ވަރަށް ބޮޑު އަނިޔާއެއް ލިބިލައްވާފައެވެ. އެއީ އެކުވެރި ކުދިންނާއެކު ޓީވީ ބަލަން އުޅުއްވުމުގެ ތެރޭގައި ވެއްޓިފަ ބަނޑަށް ލިބުނު ވަރަށް ފުން ޒަޚަމެކެވެ. އެންމެ ކުޑައިރުވެސް އަޙުމަދު ރަޝީދަކީ ވަރަށް ކިޔަވާހިތްވާ ކުއްޖެކެވެ. ކިޔަވައިގެން މޮޅުމީހަކަށް ވުމަކީ އޭނާގެ ކުޑައިރުގެ އެއް އަމާޒެވެ.

އަޙުމަދު ރަޝީދުވަނީ ވަރަށް ކުޑައިރު ކިޔެވުމުގެ ދިގު ދަތުރަށް ފައްޓަވާފައެވެ. އޭނާއަކީ ކިޔަވާ ހިތްޖެހިގެން މައިންބަފައިންކައިރީ ކިޔައިގެން ކިޔެވުމަށް މަސައްކަތްކުރެއްވި ފަރާތެކެވެ. މިގޮތުން އޭނާ ހއ.އިހަވަންދޫ ގިރިޓީގޭ ދޮންދައިތަ ކައިރިންނާއި އަދި ހައްވަދައިތަ ކައިރިން ޤުރްއާން ކިޔަވަން ދަސްކުރައްވާފައިވެއެވެ. މަދަރުސާއަށް ދުރުވުމުގެ ކުރިން އޭނާވަނީ ހއ.އިހަވަންދޫ ފެމޯރާގޭ ވަފިއްޔާ އަބުދުލްޣަނީގެ ކައިރިންނާއި ހއ.އިހަވަންދޫ އިރަމާގޭ ޒަހީރާ ޢަބުދުއް ޞަމަދުގެ ކައިރިން ހިސާބު ޢިލްމު އުގެނިފައިވެއެވެ.

އުމުރުން 8 އަހަރުގައި އަޙުމަދު ރަޝީދު އިހަވަންދޫ މަދަރުސާއަށް ކިޔެވުމަށް ދާންފެއްޓެވިއެވެ. އިހަވަންދޫ މަދަރުސާގައި ފުރަތަމަ ކިޔަވަމުން ގެންދެވީ "ސްޕެޝިއަލް ކުލާސް 1" ގައެވެ. ގުރޭޑު 6 އަކާ ހަމައަށް އިހަވަންދޫ މަދަރުސާއިން ކިޔެވުމަށްފަހު އިތުރަށް ކިޔެވުމަށްޓަކައި ހއ.ހުވަރަފުށްޓައް ދުރުވިއެވެ. ނަމަވެސް އުމުރުން ދޮށިވުމުގެ ސަބަބުން ހުވަރަފުށީ މަދަރުސާއަކަށް ނުވަދެވުނެވެ. ބިންހިމަގޭ އާބިދާއްތަގެ އެހީތެރިކަމުގައި އޭނާއަށް ފޮތްތައް ލިބުމުން އަލުން އިހަވަންދޫ މަދަރުސާއަށް ގުރޭޑު 7 އަކަށް ވެންނެވިއެވެ.

އަޙުމަދު ރަޝީދުގެ ބައެއް އެކުވެރިން އިތުރަށް ކިޔެވުމަށްޓަކައި މާލެދިޔުންވީ އޭނާވެސް މާލެދިޔުމަށް އިތުރަށް ޝައުޤުވެރި ކުރުވި ކަމަކަށެވެ. އެހާ ހިސާބުން އޭނާ ކިޔަވަން މާލެ ދިޔުމަށް ޢަޒުމް ކަނޑައެޅުއްވިއެވެ. ކަންދިމާކުރިގޮތުން އެއަހަރުގެ މެދުތެރޭގައި މާލޭގައި ކިޔަވަން ހުންނާނެތަނެއް ހަމަޖެހުނެވެ. އޭނާއަކީ އާއިލާގައި ހުރި ހަމައެކަނި ފިރިހެންކުއްޖާއަށް ވުމުން، ކިޔަވަން މާލެ ދިޔުމަކީ މައިންބަފައިން އެހާ އެދޭކަމަކަށް ނުވިޔަސް އޭނާ މާލެދުރުވީ ކިޔެވުމަށްހުރި ޝައުޤެއްގެ ބޮޑުކަމުންނެވެ. އޭނާ މާލެއަށް ދުރުވެ މަދަރުސަތުލް އަހުމަދިއްޔާއިން ގުރޭޑު 6 ން ފެށިގެން 10 އާ ހަމައަށް ކިޔެވިއެވެ.

10 ނިންމުމަށްފަހު އިތުރަށް ކިޔެވުމަށް ސައިންސް އެޑިޔުކޭޝަން ސެންޓަރ، އެސް.އީ.ސީ (މިހާރުގެ ސީ.އެޗް.އެސް.އީ) އަށް ވަނުމަށް އަޙުމަދު ރަޝީދު މަސައްކަތްކުރެއްވިއެވެ. ނަމަވެސް އުމުރުން ދޮށިވުމުގެ ސަބަބުން އެތަނަށް ވަދެވޭގޮތެއް ނުވިއެވެ. އެހެންވެ ކުއްލިއްޔަތުލް ދިރާސަތުލް އިސްލާމިއްޔާގައި އިސްލާމް ކޯހެއް ކިޔަވަންފެއްޓެވިއެވެ. ނަމަވެސް އޭނާގެ ބައްޕަ ވަރަށް ބޮޑަށް ބަލިވުމާއި ގުޅިގެން ކޯސް ދޫކޮށްލާފައި ރަށަށް ދުރުވިއެވެ. އަދި 1998 ން ފެށިގެން ވަގުތީ މުދައްރިސެއްގެ ގޮތުގައި އިހަވަންދޫ މަދަރުސާގައި ހަރަކާތްތެރިވާން ފެއްޓެވިއެވެ.

ގިނަ ކޯސްތަކެއް ނިންމެވުމަށްފަހު މިހާރު އަހުމަދު ރަޝީދު ހަރަކާތްތެރިވަމުން ގެންދަވަނީ އިހަވަންދޫ މަދަރުސާގެ ކޮލިފައިޑް ލީޑިންގް ޓީޗަރެއްގެ ގޮތުގައެވެ. ތަޢުލީމީ ދާއިރާއިން އޭނާއަށް މިހާ ކުރިލިބިލެއްވީ އެތައް ކޯސްތަކެއް ހެއްދެވުމަށްފަހުގައެވެ. މިގޮތުން އޭނާވަނީ 2000 ވަނަ އަހަރު ފެކަލްޓީ އޮފް އެޑިޔުކޭޝަންގައި ސާނަވީ އިސްލާމް މުދައްރިސެއްގެ ކޯސް ހައްދަވަން ފައްޓަވައިފައެވެ. އޭނާ މާލޭގައި ވަޒީފާ އަދާކުރައްވަމުން އިތުރު ކޯސްތައް ހައްދަވަމުން ގެންދެވިއެވެ. މިގޮތުން 2006 ވަނަ އަހަރު މިނިސްޓްރީ އޮފް އެޑިޔުކޭޝަންއިން ސުޕަވައިޒަރއެއްގެ މަޤާމް ލިބިލެއްވިއެވެ. އަދި އެވަޒިފާގައި އުޅުއްވަމުން 2007 ވަނަ އަހަރު އޭނާ އިސްލާމް ޓީޗިންގްއިން ޑިޕޮލޮމާ ޙާޞިލްކުރރެއްވިއެވެ.  

2008 ވަނަ އަހަރު އަޙުމަދު ރަޝީދު ބެޗިލަރް އޮފް އެޑިޔުކޭޝަން ހައްދަވަން ފެއްޓެވިއެވެ. ނަމަވެސް މަންމަ ބަލިވުމާއި ގުޅިގެން ކޯސްދޫކޮށް އެނބުރި ރަށަށް ދުރުވިއެވެ. އަދި ރަށު މަދަރުސާގައި ވަޒީފާ އަދާކުރައްވަން ފެއްޓެވިއެވެ. 2010 ވަނަ އަހަރު އިސްލާމް ޓީޗިންގް ޑިގުރީ ހެއްދެވުމަށްޓަކައި ދުރުވިއެވެ. އަދި 2011 ވަނަ އަހަރު އެކޯސް ފުރިހަމަކުރެއްވިއެވެ. އަދި އޭނާވަނީ 2012 އަދި 2013 ވަނަ އަހަރުގެ ތެރޭގައި ޑިޕޮލޮމާ އިން ސުކޫލް މެނޭޖްމަންޓް ހައްދަވާފައެވެ. މީގެ އިތުރުންވެސް އެތައް ވޯކްޝޮޕްތަކެއްގައި ބައިވެރިވެ އޭނާވަނީ ތަޖުރިބާ ޙާޞިލްކުރައްވާފައެވެ. މާލެއިންނާއި އެހެން ރަށްތަކުން އަހުމަދު ރަޝީދަށް ލިބިލެއްވި ވަޒީފާގެ ފުރުޞަތުތައް ދޫކޮށްލައްވާ ރަށަށް ދުރުވީ ރަށުގެ މައްޗަށް އޭނާގެ ހިތުގައި އޮންނަ ލޯތްބެއްގެ ގަދަކަމުންނެވެ. އަމިއްލަ ވަޒަނަށް ޚިދުމަތް ކުރުމުގެ މަތިވެރި މަޤުޞަދުގައެވެ.  

މަދަރުސާގައި އުޅުނު ދުވަސްވަރު އަޙުމަދު ރަޝީދުވަނީ ވަރަށް ގިނަގުނަ ކާމިޔާބީތަކެއް ހޯއްދަވާފައެވެ. މިގޮތުން އެކިފަހަރުމަތިން ބޭއްވޭ ޤުރްއާން މުބާރާތްތަކުން އޭނާވަނީ ފާހަގކޮށްލެވޭފަދަ ފަޚުރުވެރި ވަނަތަކެއް ހޯއްދަވާފައެވެ. މަދަރުސާގައި އުޅުނު ދުވަސްވަރު އެންމެ ރަނގަޅު ދަރިވަރުގެ ގޮތުގައި މުދައްރިސުން އޭނާ ފާހަގަކުރައްވައެވެ. ކުއްލިއްޔާގައި އުޅުނު ދުވަސްވަރު ފުރަތަމަ ސެމިސްޓަރއިން އެއްވަނަ ޙާޞިލްކުރައްވާ އަދި ޑިގްރީ ކޯހުން ތިންވަނަ ޙާޞިލް ކުރައްވާފައިވެއެވެ.

އަޙުމަދު ރަޝީދަކީ އެންމެނާވެސް ގުޅޭ ވަރަށް ހިތްހެޔޮ މަޖާ މިޖާޒެއްގެ ވެރިއެކެވެ. އޭނާ ވެފައިވަނީ ރަށު އެންމެންގެވެސް ގާތް ރަޙުމަތްތެރިއަކަށެވެ. ގިނަ ދަރިވަރުންތަކެއްގެ މެދުގައި އެންމެ މަޤުބޫލު މުދައްރިސަކަށް އޭނާވެފައިވަނީ ސަބަބެއް ނެތިއެއްވެސް ނޫނެވެ. އެއީ ކިޔަވާދިނުމުގައި ގެންގުޅޭ މޮޅެތި [ޓެކްނިކް]ތަކުގެ ސަބަބުންނެވެ. ދަރިވަރުންނާއި މެދުގައި ގެންގުޅޭ ހަމަހަމަކަމާއި އޯގާތެރިކަމުގެ ސަބަބުންނެވެ. ހާއްސަކޮށް އޭނާގެ މަޖާ މިޖާޒުގެ ސަބަބުންނެވެ. އަދި ހަމަ އެހެންމެ އޭނާއަކީ ރަށުގައި އިމާމުވެ ހުކުރުކުރައްވާ ފަރާތެކެވެ. އަދި އެހާމެ ރީތިކޮށް ޤުރްއާން ކިޔަވާ ފަރާތެކެވެ. އަޙުމަދު ރަޝީދަކީ އޭނާގެ ރަށަށް އެތައް ގިނަގުނަ ޚިދުމަތްތަކެއް ކުރަމުންގެންދަވާ ފަރާތެކެވެ. ރަށުގައި އޮންނަ އެންމެ ދުވަސްވީ ޖަމިއްޔާކަމުގައިވާ އިމަގު ޖަމިއްޔާގެ ތިންވަނަދައުރުގެ ރައީސްކަންވެސް އޭނާވަނީ ކުރައްވާފައެވެ.

އަޙުމަދު ރަޝީދު ޒަވާޖީ ޙަޔާތެއް ފަށާފައިވަނީ 2001 ވަނަ އަހަރުގައެވެ. އޭނާ ކައިވެނި ކުރައްވާފައިވަނީ ހއ.އިހަވަންދޫ ފުނަމާގޭ ސަމީމާ ޢަބްދުއް ސައްތާރާއެވެ. އެދެމަފިރިންގެ ކައިވެންޏަށް މިހާރު 12 އަހަރުވީއިރު ދެކުދިން ލިބިފައިވެއެވެ. އެއީ އަންހެންކުއްޖަކާއި ފިރިހެންކުއްޖެކެވެ. ގަރުދިޔަ އާއި ބަތާއި ލޮނުމިރުހަކީ އަޙުމަދު ރަޝީދު އެންމެ ގަޔާވާ ކެއުމެވެ. ފުރަތަމަ ދަރިފުޅު އުފަންވި ދުވަސް އެއީ އޭނާގެ ޙަޔާތުގައި އައި އެންމެ އުފާވެރިދުވަހެވެ. އަދި އޭނާ އެންމެ ދެރަވީ އޭނާގެ މަންމަ ނިޔާވި ދުވަހުއެވެ. އޭނާ އެންމެ ދެކެން ބޭނުންވާ ދުވަހަކީ ކިޔެވުމުން ޕީ.އެޗް.ޑީއެއް ޙާޞިލްކުރެވޭނެ ދުވަހެވެ. ޙަޔާތުގައި އޭނާއަށް ކުރެވުނު އެންމެ ބޮޑު އެއް ތަޖުރިބާއަކީ ދިމާވާ އެކިއެކި ކަންކަމުގައި ކެތްތެރިވުމުގެ މުހިއްމުކަމެވެ.

އަޙުމަދު ރަޝީދު މުޖުތަމަޢަށް ދޭން ބޭނުންވާ މެސެޖަކީ ކޮންމެ މީހަކުވެސް، މާތްﷲ ސުބްހާނަހޫ ވަތަޢާލާ އެމީހާ ދުނިޔެއަށް ފޮނުއްވި ބޭނުން ފުރިހަމަކުރާ މީހާކަށްވާށެވެ. ދިރިއުޅުން ކާމިޔާބު ކުރެވޭނެވަރުގެ ޤާބިލު މީހަކަށް ވާށެވެ. އަދި ކަންތައްތަކުގައި ކެތްތެރިވެ، އަބަދުވެސް މަރުމަތިން ހަނދާކުރާ ބަޔަކަށް ވާށެވެ. ކަށްވަޅަށް ދާންދެން ކިޔެވުމުގައި ކުރިއަރައިދާ ބަޔަކަށް ވާށެވެ.

- އިސްމާޢިލް ޝިޔާޒް -