ހއ.އިހަފަރު ފަޅު މަރާމާތުކުރުމުގެ މަސައްކަތް އެރަށުގެ ރައްޔިތުން ނުކުމެ ހުއްޓުވުން

2004 ވަނަ އަހަރު ރާއްޖެއަށް ކުރިމަތިވި ސުނާމީ ކާރިސާގައި އިހަފަރު ފަޅުވަނީ ވަރަށް ބޮޑަށް ހަލާކުވެފައެވެ. މިފަޅު މަރާމާތުކުރުމުގެ މަސައްކަތް ސަޢުދީ ސަރުކާރުގެ ހިލޭ އެހީގެ ދަށުން ކުރިޔަށް ގެންދަނިކޮށް، އިހަފަރު ރައްޔިތުން ނުކުމެ މިމަސައްކަތްވަނީ ހުއްޓުވާފައެވެ. މިރިޕޯޓަކީ މިނިސްޓްރީ އޮފް ހައުސިންގެ ފަރާތުން މިމައްސަލަ ދިރާސާކޮށް ލިޔާ ރިޕޯޓެކެވެ. މިރިޕޯޓުގައި އެކުލެވިގެންވާނީ ފަޅު މަރާމާތުކުރުމުގެ މަސައްކަތް ފެށިގެން ދިޔަގޮތާއި، މަސައްކަތް ހުއްޓުވާލި ގޮތާއި، މަސއްކަތް ހުއްޓުވުމަށް މެދުވެރިވި ސަބާބާއި އަދި މަސައްކަތް ކުރިއަށް ގޮސްފައިވާ މިންވަރެވެ.

މަސައްކަތް ފެށުން:

އިހަފަރު ފަޅު މަރާމާތުކުރުމުގެ މަސައްކަތް ޢަމަލީގޮތުން ފަށާފައިވަނީ 2010 ޑިސެމްބަރު 26 ވަނަ ދުވަހުއެވެ. މިމަސައްކަތް ކުރުމާ ހަވާލުވެފައިވަނީ އުވަދޯނި ކޮންސްޓްރަކްޝަން އެވެ. ފަޅު މަރާމާތުކުރާއިރު، ފަޅު އިތުރަށް ފުންކޮށް އަދި ފަޅު ބޮޑުކުރުމާއެކު ފަޅުގެ ދެފަރާތުން ރިވެޓްމަންޓް ޖެހުމުގެ މަސައްކަތްވެސް އުވަދޯނި ކޮންސްޓްރަކްޝަނުން ކުރާގޮތަށްވަނީ ހަމަޖެހިފައެވެ. އުވަދޯނި ކޮންސްޓްރަކްޝަނުން މިމަސައްކަތާ ހަވާލުވެފައިވަނީ 4 މަސް ދުވަހުގެތެރޭގައި މަސައްކަތް އެއްކޮށް ނިންމާ ގޮތަށެވެ. މިކުންފުނިން ފުރަތަމަ ފަށާފައިވަނީ ފަޅު ފުންކޮށް އަދި ވާޓަރުގަނޑު މަރާމާތުކޮށް އިތުރަށް ވަރުގަދަ ކުރުމުގެ މަސައްކަތެވެ. މިމަސައްކަތް ކާމިޔާބު ކަމާއެކީ ނިންމާލުމަށްފަހު، އެކުންފުނިން ދެންފެށީ އިހަފަރު ފަޅު ބޮޑުކުރުމުގެ މަސައްކަތެވެ. އެމަސައްކަތަށް ފެށުމާއެކު އެރަށުގެ ރައްޔިތުންތަކެއް ނުކުމެ މަސައްކަތަށް ހުރަސްއަޅައި މަސައްކަތް ހުއްޓުވާލިއެވެ.

މަސައްކަތް ހުއްޓުވުން:

އިހަފަރު ފަޅު ފުންކުރުމުގެ މަސައްކަތް އެރަށުގެ ރައްޔިތުން ހުއްޓުވާލާފައިވަނީ 2011 ފެބުރުއަރީ 7 ވަނަ ދުވަހުއެވެ. އެދުވަހުގެ ހެދުނުގެ ވަގުތެއްގައި ރަށުގެ ރައްޔިތުންތަކެއް ނުކުމެ އުވަދޯނި ކޮންސްޓްރަކްޝަންގެ ވެހިކަލްތަކާއި އެކުންފުނީގެ މުވައްޒަފުންތައް ތިބޭ ސަރަހައްދު ވަށާލައި މަސައްކަތް ހުއްޓާލުމަށް އަންގާފައިވެއެވެ. އަދި އެކުންފުނީގެ ބައެއް ވެހިކަލްތަކުގެ ހަން ފަޅައި އަދި ބިއްލޫރިތައްވެސް ތަޅާލާފައިވާކަމަށް އެކުންފުނީގެ ޑިރެކްޓަރ މަޢުލޫމާތު ދެއްވައެވެ. ހަމައެއާއެކު ރައްޔިތުންގެ ފަރާތުން ލިބުނު ގެއްލުމުގެ ސަބަބުން އުވަދޯނި ކޮންސްޓްރަކްޝަންގެ މުވައްޒަފުން އެކުންފުނީގެ ވެހިކަލްތަކާއި އަދި އެނޫނަސް މަސައްކަތްކުރަން ގެންގުޅުނު ސާމާނުތަކާއެކު އެދުވަހުގެ ރޭގަނޑުގެ ވަގުތެއްގައި ފުރާފައިވާކަމަށް ރަށު ކައުންސިލުން މަޢުލޫމާތު ދެއްވައެވެ. މިމަސައްކަތް ހުއްޓުވަން ޖެހުނީ ރައްޔިތުންގެ ޚިޔާލު މިކަމުގައި ނުހޯދާތީކަމަށް ރައްޔިތުންގެ ތެރެއިން ބަޔަކު ބުނަމުން ދާއިރު، ކައުންސިލުން މިކަން ދޮގުކުރެއެވެ.

މަސައްކަތް ހުއްޓުވި ސަބަބު:

ފަޅު މަރާމާތުކުރުމުގެ ކޮންޓްރެކްޓުގައި ވާގޮތުން ފަޅު ބޮޑުކުރަން ހަމަޖެހިފައިވަނީ އެންމެ 100 ފޫޓަށެވެ. ނަމަވެސް ރަށުގެ ރައްޔިތުން ބޭނުންވަނީ ފަޅު އެންމެ ކުޑަވެގެންވެސް 300 ފޫޓަށް ބޮޑުކުރުމަށެވެ. އަދި ފަޅު ބޮޑުކުރުމުގެ މަސައްކަތް ހުއްޓުވާލަން ޖެހުނީ ރައްޔިތުންގެ ޚިޔާލު މިކަމުގައި ނުހޯދާތީކަމަށް ރައްޔިތުންގެ ތެރެއިން ބަޔަކު މަޢުލޫމާތުދިނެވެ. ނަމަވެސް އިހަފަރުގެ ޚަބަރުތައް އެކުލެވޭ ވެބްސައިޓެއް ކަމަށްވާ އިހަފަރު ޑޮޓް ކޮމްގައި ޝާއިޢުކޮށްފައިވާ ޚަބަރެއްގައި ވާގޮތުން، ފަޅު މަރާމާތުކުރުމުގައި ރައްޔިތުންގެ ޚިޔާލު ހޯދުމަށް އިހަފަރު ދާއިރާގެ ޢިއްޒަތްތެރި މެމްބަރު އަލްފާޟިލް މުޙައްމަދު ޤާސިމް ނަޝީދު ރައްޔިތުންނާ ބައްދަލު ކުރެއްވިއެވެ. މިބައްދަލުވުމަށް ހާޒިރުވީ ހަމައެކަނި ކަޅުކުލަ ޕާޓީގެ މަދު ރައްޔިތުންތަކެކެވެ. އަދި ހަމައެހެންމެ އިހަފަރުގައި ނެރޭ ނޫހެއް ކަމުގައިވާ "ބައްތިރީސް" ނޫހަށް ރަށު ކައުންސިލްގެ ރައީސް އަލްފާޟިލް އިބްރާހީމް ޔާމީން ވަޙީދު މިކަމާ ގުޅޭގޮތުން ދީފައިވާ ބަސްދީގަތުމެއްގައި ވާގޮތުން ފަޅު މަރާމާތުކުރުމުގައި ރައްޔިތުންގެ ޚިޔާލު ހޯދުމަށް  އިންތިޒާމްކުރި ބައްދަލުވުންތަކަށް، އަޑުގަދަކުރާއިންނާއި ދަޢުވަތު ކާޑުން ރައްޔިތުންނަށް ދެންނެވުމުން ހާޒިރުވީ މަދު ބަޔެކެވެ. އަދި ރަށުގެ މަދަނީ ޖަމިއްޔާތަކުގެ ތެރެއިން ޚިޔާލު ފާޅުކޮށް އުޅެނީ ހަމައެކަނި "ފަތިފުށް" ޖަމިއްޔާއިންނެވެ. ރައްޔިތުން މަސައްކަތަށް ހުރަސް އެޅުމުން މަސައްކަތާ ހަވާލުވެފައިވާ ކުންފުނިންވަނީ އެމަސައްކަތް ނުނިންމަ އެރަށުން ފުރާފައެވެ.

މަސައްކަތް ގޮސްފައިވާ މިންވަރު:

އުވަދޯނި ކޮންސްޓްރަކްޝަންގެ މަސައްކަތަށް އިހަފަރުގެ ރައްޔިތުން ހުރަސް އެޅުމުން ފަޅު މަރާމާތުކުރުމުގެ މަސައްކަތް އެއްކޮށް ނުނިމިއެވެ. މިގޮތުން ފަޅު ފުންކުރުމާއި  ވާޓަރުގަނޑު މަރާމާތުކުރުމުގެ މަސައްކަތް އެއްކޮށް ނިމިފައި ވީނަމަވެސް ފަޅު ބޮޑުކުރުމާއި ރިވެޓްމަންޓް ޖެހުމުގެ މަސައްކަތްވަނީ ނުނިމިއެވެ. މިމަސައްކަތް ދެން ކުރިއަށް ގެންދެވޭނީ މިހާރު ޖެހިގެން މިއުޅޭ މައްސަލައަށް ރަނގަޅު ހައްލެއް ގެނެވިގެންނެވެ.

ހައްލު:

ރަށުގެ ޚަބަރުފަތުރާ މީޑިއާތަކުންނާއި ރަށު ކައުންސިލުން މަޢުލޫމާތުދެއްވާ ގޮތުގައި މިޢަމަލަކީ ރައްޔިތުންގެ ތެރެއިން ބަޔަކު ސިޔާސީ މަޤްޞަދެއްގައި ހިންގާފައިވާ "ޖަރީމާ"އެކެވެ. ފަޅު މަރާމާތުކުރުކުގެ މަސައްކަތް ހުއްޓުވުމުގައި އިސްވެ އުޅެފައިވަނީ މިހާރުގެ ސަރުކާރާ އެންމެ އިދިކޮޅު ކަށިކުތަން ޕާޓީގެ ބަޔަކުކަމަށްވެސް ބައެއް މީޑިއާތަކުން ހާމަކޮށްފައިވެއެވެ. ނަމަވެސް މިހާރު ރަށުގެ ގިނަ އަދަދެއްގެ ބަޔަކު އެދެނީ ފަޅު ބޮޑުކުރާ މިންވަރު އިތުރުކުރުމަށެވެ. އެއީ ރަށަކީ މަސްވެރި ރަށަކަށްވެފައި މިހާރުވެސް ފަޅުގެ ޖާގައިގެ ދަތިކަން ކުރިމަތިވާތީކަމަށް ރަށުގެ ރައްޔިތުން މަޢުލޫމާތުދެއެވެ. އެހެންކަމުން މިމައްސަލައިގެ އެންމެ އެދެވޭ ހައްލަކަށްވާނީ ރަށުގެ ގިނަ ރައްޔިތުންތަކެއް އެދޭފަދައިން ފަޅު ބޮޑުކުރާ މިންވަރު އިތުރުކުރުމެވެ.

- އިސްމާޢިލް ޝިޔާޒް -