ޤައުމީ ލީޑަރުންގެ ކިބައިން ފެންނަންޖެހޭ ރިވެތި ސިފަތައް

ޑިމޮކްރަސީގެ ކަނޑުގައި ރާއްޖެ ދަތުރުކުރަން ފެށުމާއެކު އެކިއެކި ސިޔާސީ ޕާޓީތައް އުފެދިގެން ދިޔައެވެ. ހަމަ އެއާއެކުހެން ޤައުމުގެ ކަންކަން ރަނގަޅު ކުރުމަށްޓަކައި ދިވެހި ރައްޔިތުންގެ ތެރެއިން ބަޔަކު އިސްނަގައި ލީޑަރުންގެ ގޮތުގައި ހަރަކާތްތެރިވާން ފެއްޓިއެވެ. ނަތީޖާއެއްގެ ގޮތުން ޤައުމު އެބަޔަކަށް އަބަދާއި އަބަދު ފާރަލަމުންގެންދާ ބަޔަކަށް އެޤައުމީ ލީޑަރުންތައް ވެގެންދިޔައެވެ. ނޫސްތަކުގެ ފަލަ ސުރުޚީތައް ފަޅުފިލުވަމުންދަނީ އެލީޑަރުންގެ ވާހަކަތަކުންނެވެ. ޓީވީއިން ފެންނާތީއާ ރޭޑިއޯއިން ކިޔާތީ އަޑުއިވެނީ އެލީޑަރުންގެ ވާހަކަތަކެވެ. ޤައުމުގައި މިފަދަ މުހިއްމު ބަޔަކަށް އެލީޑަރުން ވީހިނދު ރައްޔިތުންނަށް ނަމޫނާ ބަޔަކަށްވެ، އެލީޑަރުންގެ ކިބައިގައި ތެދުވެރިކަން، އަމާނާތްތެރިކަން، ވަޢުދު ފުއްދުން، ރިވެތިބަހުން ވާހަކަދެއްކުން އަދި އެހެން މީހުންނަށް އިޙްތިރާމްކުރުންފަދަ ރިވެތި ސިފަތައް ހުރުމަކީ މުހިއްމު ކަމެކެވެ.

ޤައުމީ ލީޑަރުންގެ ކިބައިން ފެންނަންޖެހޭ އެންމެ މުހިއްމު އެއް ރިވެތި ސިފައަކަށްވާނީ ތެދުވެރިކަމެވެ. ތެދުވެރިކަމަކީ ކޮންމެ ލީޑަރެއްގެ ކިބައިގައި ހުރުން އެހައިމެ މުހިއްމު ސިފައެކެވެ. އެހެންކަމުން ޤައުމީ ލީޑަރުން ވާންޖެހޭނީ ކޮންމެ ކަމެއްގައިވެސް ރައްޔިތުންނަށް ޙަޤީގަތް ހާމަކޮށްދޭ ބަޔަކަށެވެ. ދޮގު ހަދައި އޮޅުވާލުމަކީ ޤައުމީ ލީޑަރުންގެ ކިބައިން ފެނިގެން ނުވާނޭ ސިފަތަކެވެ. އެފަދަ ނުބައި ސިަފަތަކުގެ ވެރިއަކަށް ޤައުމީ ލީޑަރުން ވެއްޖެނަމަ ޤައުމު ބައިބައިވެ ފަސާދަވުމަކީ ދުރުގައި އޮތްކަމެއް ނޫނެވެ. އެހެންކަމުން ޙަޤީގަތް ހާމަކުރުމާއި ތެދުވެރިކަމަކީ ޤައުމީ ލީޑަރުންގެ ކިބައިން ފެންނަންޖެހޭ ސިފައެކެވެ.

ތެދުވެރިކަމެކޭ އެއްގޮތަށް އަމާނާތްތެރިކަމަކީވެސް ޤައުމީ ލީޑަރުންގެ ކިބައިން ފެންނަންޖެހޭނެ ވަރަށް ރިވެތި ސިފައެކެވެ. ޤައުމީ ލީޑަރުންނަކީ ބޮޑެތި މަސްއޫލިއްޔަތުތަކެއް ބޮލުގައި އަޅައިގެން ތިބި ބަޔަކަށް ވީހިނދު، އެލީޑަރުންގެ ކިބައިން އަމާނާތްތެރިކަމާއި ވަފާތެރިކަމާއެކު އެ މަސްއޫލިއްޔަތުތައް އަދާކުރަން ޖެހޭނެއެވެ. އަދި އެލީޑަރުންގެ "ކޮރަޕްޝަން"ގެ މައްސަލަތަކާއި އެނޫން މައްސަލަތައް ކޯޓުތަކުގެ ޣާޒީންގެ "ބޮލުގެ ރިހުމަކަށް" ވެގެން ނުވާނެއެވެ. އެގޮތަށް ކަންތައް ދިމާވެއްޖެނަމަ ރައްޔިތުންގެ ކުރިމަތީ އެމީހެއްގެ އަގުވެއްޓި، އިތުބާރު ގެއްލިގެން ދާނެއެވެ. އެހެންވެ ޤައުމީ ލީޑަރުންގެ ކިބައިން އަމާނާތްތެރިކަން ފެންނަން ޖެހެއެވެ.

އަމާނާތްތެރިކަމަށްފަހު ޤައުމީ ލީޑަރުންގެ ކިބައިން ފެންނަން ޖެހޭނޭ ރިވެތި އެއް ސިފައަކީ ވަޢުދުފުއްދުމެވެ. ޤައުމީ ލީޑަރުން ވެފައިވަނީ ރައްޔިތުންނަށް އެތައް ވަޢުދުތަކެއް ވަމުންގެންދާ ބަޔަކަށެވެ. އެހެންކަމުން ރައްޔިތުން އެމީހުންނަށް ކުރަމުން ގެންދާ އިތުބާރު ގެއްލުން ނުދިނުމަށްޓަކައި އެމީހުން ވަމުންގެންދާ ވަޢުދުތައް ފުއްދުމަކީ ވަރަށް މުހިއްމު ކަމެކެވެ. އެކަން އެގޮތަށް ނުކުރެވިއްޖެނަމަ ރައްޔިތުންގެ އިތުބާރު ގެއްލި "ދެއަތް ފޮޅާލައިފަ ދާން ޖެހިދާނެ" އެވެ. އެހެންކަމުން ވަޢުދު ފުއްދުމަށް ޚާއްސަ ސަމާލުކަމެއް ޤައުމީ ލީޑަރުން ދޭންޖެހޭނެއެވެ.

ރިވެތި ބަހުން ވާހަކަދެއްކުމަކީވެސް ޤައުމީ ލީޑަރުންގެ ކިބައިގައި ހުންނަން ޖެހޭނެ ރިވެތި ސިފައެކެވެ. ޤައުމީ ލީޑަރުން ވެފައިވަނީ ރައްޔިތުންގެ ޙައްޤުގައި ވާހަކަދައްކައި ވަކާލާތުކޮށް އުޅޭ ބަޔަކަށެވެ. އެހެންވެ އެމީހުން ދައްކާ ހުރިހާ ވާހަކައެއް ކަހަލައިން، މީޑިއާގެ ޒަރިއްޔާއިން ރައްޔިތުންނާ ހަމައަށް ދަނީ ފޯރުވަމުންނެވެ. އަދި ކުދިބޮޑު އެންމެންހެން ދަނީ އެވާހަކަތައް އަޑު އަހަމުންނެވެ. އެހެންކަމުން ރައްޔިތުންގެ ކުރިމަތީ އެމީހުންގެ އަގު ހިފެހެއްޓުމަށްޓަކައި، "އަވަގުރާނަ" ގޮވުމާއި ހަޑި ހުތުރު ބަހުރުވަ ބޭނުންކުރުމުން ދުރުވާން ޖެހެއެވެ. ރީތި މާތް ބަހުރުވަ ބޭނުންކޮށްގެން ވާހަކަ ދައްކައި ބަޔަކަށް ޤައުމީ ލީޑަރުން ވާންޖެހެއެވެ.

އެހެންމީހުންނަށް އިޙްތިރާމް ކުރުމަކީ އެންމެންގެ ކިބައިގައި ހުންނަންޖެހޭ ރިވެތި ސިފައެއް ފަދައިން، ޤައުމީ ލީޑަރުންގެ ކިބައިންވެސް ފެންނަންޖެހޭ ރިވެތި ސިފައެކެވެ. ޤައުމުގެ ކުރީ ސަފުގައި އަތުން ގުނާލެވޭ ވަރަށްވުރެ ގިނައިން ލީޑަރުން ތިބިއިރު، އެމީހުން ވެފައިވަނީ ތަފާތު ފިކުރުތަކެއްގެ ވެރި ބަޔަކަށެވެ. ކަންމިހެން އޮތްއިރު، ތަފާތު ފިކުރުތަކުގެ ސަބަބުން އަނެކާދެކެ ރުޅިއައިސް އޭނާގެ އަގު ވައްޓާލަން މަސައްކަތް ކޮށްގެން ނުވާނެއެވެ. ކޮންމެ ލީޑަރަކުވެސް އެހެން ލީޑަރުންނަށާއި އެމީހުންގެ ފިކުރަށް އިޙްތިރާމް ކުރަން ޖެހޭނެއެވެ. މިއީ ޤައުމީ ލީޑަރުންގެ ކިބައިން ފެންނަންޖެހޭ ރިވެތި ސިފައެކެވެ.

ޤައުމުގައި ލީޑަރުންތަކެއް އުފެދި ޤައުމުގެ އެންމެ އިސް ސަފުގައި އެލީޑަރުންތައް ހަރަކާތްތެރިވަމުން ގެންދާއިރު، އެމީހުން ވެފައިވަނީ އެންމެންގެ ކަޅި އެބަޔަކާ ދިމާއަށް އަމާޒުކުރެވޭ ބަޔަކަށެވެ. ތެދުވެރި އަމާނާތްތެރި ބަޔަކަށެވެ. ވަޢުދުފުއްދާ ބަޔަކަށެވެ. ރިވެތި ބަހުން ވާހަކަދައްކާ ބަޔަކަށެވެ. އެހެންމީހުންނަށް އިޙްތިރާމްކުރާ އަދަބުވެރި ބަޔަކަށެވެ. ރައްޔިތުންނަށް ނަމޫނާ ބަޔަކަށެވެ.

- އިސްމާޢިލް ޝިޔާޒް -