ރަށު ކައުންސިލްގެ ރައީސްކަން ލިބިއްޖެނަމަ

ރައީސް މައުމޫނުގެ 30 އަހަރު ދުވަހުގެ ވެރިކަން ނިމި، ރައީސް ނަޝީދު ވެރިކަމަށް އައުމާއެކު، ސަރުކާރު ހިންގުމުގެ ނިޒާމަށް ބޮޑު އިންގިލާބެއް އައެވެ. މިގޮތުން ޒަމާންތަކެއް ވަންދެން އަހަރެމެންގެ ތެރޭގައި އޮތް ކަތީބުކަން ކައުންސިލްކަމަށް ބަދަލުކުރިއެވެ. އެއަށްފަހު ރަށްތައް ތަރައްޤީކޮށް ހިންގުމުގެ ބުރަ މަސްއޫލިއްޔަތު ކައުންސިލަރުންނާ ހަވާލުވިއެވެ. ކަން މިހެން އޮތްއިރު އިހަވަންދޫ ކައުންސިލް އިދާރާގެ ރައީސްކަން އަހަރެންނަށް ލިބިއްޖެނަމަ ރަށުގެ ކުރިމަގަށާއި ތަރައްޤީއަށް ބޮޑެތި މަޝްރޫޢުތަކެއް ހިންގާނަމެވެ. އިހަވަންދޫގެ ރައްޔިތުން އެއްބައިވަންތަކޮށް، ރަށާ ކައިރި ފަޅު ރަށްތައް ރައްޔިތުންނަށް ހޯދައިދީ، ރަށުގެ މަގުތަކުގައި ގާ އަތުރާ، ރަށުގެ ބިން ހިއްކައި އަދި އިސްލާމީ މަރުކަޒެއް އިހަވަންދޫގައި އަޅާނީ އަހަރެންގެ ކައުންސިލްގެ ރައީސްކަމުގެ ދަށުގައެވެ.

އިހަވަންދޫ ކައުންސިލްގެ ރައީސްކަން އަހަރެންނަށް އަހަރެންނަށް ލިބިއްޖެނަމަ އެންމެ އިސްކަމެއް ދީގެން ކުރާނެ އެއްކަމަކީ އިހަވަންދޫގެ ރައްޔިތުން އެއްބައި ކުރުމެވެ. ތަފާތު ކުލަތަކުގެ ސަބަބުން ބައިބައިވެފައިވާ ރައްޔިތުންގެ ހިތްތައް އެއްބައިވަންތަ ކުރާނީ ތަފާތު އިޖްތިމާޢީ ޙަރކާތްތަކާއި ފޯރިގަދަ ކުޅިވަރުތަކުގެ ތެރެއިންނެވެ. މިގޮތުން ރަށަށް ފައިދާ ކުރަނިވި ތަފާތު ފެންވަރުގެ އިޖްތިމާޢީ ހަރަކާތްތައް ރަށުގައި ކުރިއަށް ގެންދެވޭނެއެވެ. އަދި ހަމައެހެންމެ ފުޓުބޯޅަ، ވޮލީ، ބަށި ފަދަ ފޯރިގަދަ ކުޅިވަރުތައް ރަށުގެ ދެއަވަށުގެ ރައްޔިތުންގެ މެދުގައާއި، މުސްކުޅިންނާއި ޒުވާނުންގެ މެދުގައާއި އަދި މިނޫނަސް ރައްޔިތުންގެ މެދުގައި ތަފާތު ގޮތްގޮތަށް ބާއްވާނަމެވެ. އޭރުން ޕާޓީގެ ރޫޙު ރައްޔިތުންގެ ހިތުތެރެއިން ފިލައި އިޖްތިމާޢީ ރޫޙް އަށަގަންނާނެއެވެ.

ރަށުގެ ރައްޔިތުން އެއްބައިވަންތަ ކުރުމަށްފަހު ދެން އިސްކަމެއް ދޭނީ ރަށާ ކައިރި ފަޅު ރަށްތައް ކައުންސިލްގެ ބެލުމުގެ ދަށަށް ގެންނާށެވެ. އަދި ހުވަހަންދޫއާއި ގައްލަންދޫފަދަ ފަޅު ރަށްތައް ކައުންސިލްގެ ބެލުމުގެ ދަށަށް ގެނެސް އެރަށްތަކުން، ރައްޔިތުންނަށް ބިން ކުއްޔަށް ދެވޭނެއެވެ. އެއީ ދަނޑުވެރިކަމާއި، ލޮނުމަސްއެޅުމާއި އަދި އޮޑި ބަނުންފަދަ މަސައްކަތްތައް ކުރުމަށެވެ. އަދި މިމަޝްރޫޢު ކާމިޔާބު ކަމާއެކީ ކުރިޔަށް ގެންދާނަމެވެ. އޭރުން އިހަވަންދޫ ރައްޔިތުންނަކީ ފުދުންތެރި ރައްޔިތުންތަކަކަށް ވާނެއެވެ. އަދި ހަމައެހެންމެ ރަށު ތަރައްޤީއަށް ހޭދަކުރުމަށް ފުދޭވަރެއްގެ ބަޖެޓެއް ރަށު ކައުންސިލަށް ލިބޭނެއެވެ.

ރަށުގެ މަގުތަކުގައި ގާއެތުރުމުގެ މަސައްކަތް ފަށާނީ ރަށުގެ ރައްޔިތުންނަށް މަސައްކަތް ކުރާނޭ ބިންތަކެއް ހޯދައިދީފައެވެ. މިކަން ކުރުމަށްޓަކައި ރައްޔިތު ފެންވަރުގައި ގާއެޅުމުގެ ދުވަހެއް ބާއްވާނަމެވެ. އެއަށްފަހު މަގުތަކުގެ ފަސްގަނޑު އެއްވަރުކޮށް މަގުތަކުގައި ގާ އަތުރާނަމެވެ. އަދި މިމަސައްކަތުގެ ތެރެއިން މަގުމަތީގައި އުފެދޭ ފެންގަނޑުތައް، މަގުގައި ފެންބޮޑުނުވާނެ ގޮތަކަށް ބޭރުކުރުމުގެ ނިޒާމެއްވެސް ޤާއިމު ކުރާނަމެވެ. އއެއިރުން ހިރަފުހުގެ އުދަނގުލުންނާއި މަގުމަތީ ފެންބޮޑުވުމުންވާ އުދަނގޫތަކުން ރައްޔިތުން ސަލާމަތްވާނެއެވެ.

ރަށުގެ މަގުތަކަށް ހެޔޮ ބަދަލެއް ގެނައުމަށްފަހު އަހަރެންގެ ކައުންސިލްގެ ރައީސްކަމުގައި ދެން އިސްކަމެއް ދޭނީ ރަށުގެ ބިން ހިއްކައި ބިން ބޮޑުކުރުމަށެވެ. މިގޮތުން ރަށުގެ ކުޅިމަގު ފަރާތާ ވީދިމާއިން އެކޮޅު ބޭރު ކަނޑާ ޖެހެންދެން ހިއްކާނަމެވެ. ހަމައެހެންމެ އެހިސާބުގައި ވަރުގަދަ ތޮށްޓެއް އަޅައި ރަށް ގިރުމުން ސަލާމަތްކުރާނަމެވެ. އެއިރުން ރަށުގައި މިހާރު އެންމެ ބޮޑު އެއްމައްސަލަ ކަމަށްވާ ގޯތިގެދޮރުގެ މައްސަލަ ހައްލު ކުރެވޭނެއެވެ. އަދި ހަމައެހެންމެ މިކަމުގެ ސަބަބުން ރަށަށް ބޮޑު ޢުމްރާނީ ތަރައްޤީއެއް އަންނާނެއެވެ.

އިމާރާތްތައް އެޅުމަށް ބިން ލިބުމާއެކު އިހަވަންދޫގައި އިސްލާމީ މަރުކަޒެއް ބިނާ ކުރާނަމެވެ. މިމަސައްކަތް ކުރިއަށް ގެންދާނީ ސައުދީ ސަރުކާރާއި ގުޅިގެންނެވެ. މިގޮތުން މާލޭގައި ހުންނަ ފެންވަރުގެ އިސްލާމީ މަރުކަޒެއް އިހަވަންދޫގައި ބިނާކުރާނަމެވެ. އަދި މި މަރުކަޒުގައި ޤުރްއާން އުނގަންނައިދޭ އަދި ޤުރްއާން ހިތުދަސްކުރާ ކުލާސްތަކެއް ބޭރުގެ ފުންނާބު އުސް ޤާރީންގެ ބެލުމުގެ ދަށުން ކުރިއަށް ގެންދެވޭނެއެވެ. ހަމައެހެންމެ ތަފާތު ފެންވަރުގެ އިސްލާމީ ކޯސްތައްވެސް، ޤައުމީ ޔުނިވާސިޓީއާ ގުޅިގެން މިމަރުކަޒުގައި ހިންގޭނެއެވެ. އެހެންކަމުން މިމަރުކަޒު ވެގެންދާނީ އިހަވަންދޫގެ ކުރިމަގު އުޖާލާކޮށްދޭނެ މަރުކަޒަކަށެވެ.

އިހަވަންދޫގެ ކައުންސިލް އިދާރާދެ ރައީސްކަން އަހަރެންނަށް ލިބިއްޖެނަމަ ރަށަށް ވަރަށް ބޮޑެތި ކުރިއެރުންތަކެއް އަންނާނެކަމީ ޝައްކެއްވެސް އޮތްކަމެއް ނޫނެވެ. މިގޮތުން ރަށުގެ ރައްޔިތުންނަކީ އެއްބައިވަންތަ ބަޔަކަށް ހަދައި، މަސައްކަތްކުރާނެ ބިންތައް އިހަވަންދޫގެ ރައްޔިތުންނަށް ހޯދައިދީ، ރަށުގެ މަގުތަކުގައި ގާ އަތުރާނަމެވެ. އަދި ހަމައެހެންމެ ރަށުގެ ބިން ހިއްކައި، ރަށުގެ ބިން ބޮޑުކުރުމަށްފަހު ފެންވަރު ރަނގަޅު އިސްލާމީ މަރުކަޒެއް މިރަށުގައި ޤާއިމް ކުރާނަމެވެ. އަދި އިހަވަންދޫގެ ރައްޔިތުންނަށް ތަރައްޤީ ޤައިމު ކޮށްދޭނަމެވެ.

- އިސްމާޢިލް ޝިޔާޒް -